“The Genetic Legacy of the Mongols” судалгааны тухай

Энэ судалгааны ажлыг Их Британи, Итали, Хятад, Узбекистан болон Монгол гэсэн олон улсын их сургуулиуд, эрдэм шинжилгээний хүрээлэнгүүдийн эрдэмтэд, судлаач нар хийж 2003 онд нийтлэгдсэн. Энд би зөвхөн гол гаргасан дүгнэлтүүдээс нь арай энгийнээр тайлбарлах гээд үзье гэж бодлоо. Нарийн унших хүсэлтэй бол доор байгаа линкээр үзээрэй.
Судалгаагаар хэд хэдэн жирийн бус шинжүүдтэй Y хромосомын бүлэг илрүүлсэн. Энэ нь Тодруулбал Ази тивд Номхон далайгаас Каспийн тэнгис хүртэл өргөн уудам нутагт 16 улс үндэстэнд энэ хромосомын бүлэг өндөр давтамжтайгаар олдсон байна. Энэ нь уг бүс нутгийн хүн амын 8 хувь нь буюу дэлхийн хүн амын ойролцоогоор 0.5 хувь болж байна. Уг бүлэг доторхи ялгаатай хэлбэрүүдийг судлахад тархалтын эх үүсэл нь 1000 орчим жилийн өмнөх Монгол, бүр цаашлаад Чингис хааны ойрын ураг төрөл байх үндэслэл хамгийн их байна гэж үзжээ. Ийм хурдан тархсан нь жирийн биш бөгөөд зөвхөн хүчтэй сонголтын процессоор явагдсан байх учиртай юм байна.
Хамгийн сонирхолтой нь олдож буй газруудын газар зүйн байршлаар харахад Чингис хааны байлдан дагуулж байсан газар нутгууд буюу Манжуур, Шинжаан Уйгур, Дундад азийн улсуудын газар нутаг таарч байгааг олж харсан байна. Мэдээж үүн дээр Монгол, Өвөр Монгол орно. Сүүлд байлдан дагуулсан газар нутгуудад Хазараас бусдад мэдэгдэхүйц хэмжээгээр олдоогүй. Хазаруудын 30 хувьд ийм генийн онцлог байдаг нь тэд өөрсдийгөө монгол гаралтай хэмээн ярьдаг аман домог яриа үнэн болохыг батлаж байгаа хэрэг.
Судалгаагаар өөр бас боломжуудыг авч үзсэн байна л даа. Жишээ нь ер нь энэ газар нутаг нь эрт дээр үеэс нэгэн овог аймгаас гаралтай байснаас болсон уу гэхээр эдгээр нутгийн хүн ард өөр ямар нэгэн ижил төрлийн Y хаплотипгүй тул бараг боломжгүй юм байна. Эсвэл тэр үеийн бүх монголчууд ийм хаплотиптэй байсан уу гэхээр одоогийн монголын хүн амын зөвхөн 20 хувьд байдаг тул боломжгүй талдаа.
Ингээд энэ судалгаагаар гарсан дүнгээс үзэхэд миний бодлор Чингис хааны уг клан буюу Боржигон кланы эрчүүд ийм Y хаплотиптэй байсан юм болов уу даа. Ургийн овгоо Боржигон гэж авсан хүмүүс талаас лав илүү гэж сонссон юм байна. Ингэхлээр эдгээрийн ихэнх нь худлаа боржигонууд гэдэг нь тодорхой юм шиг.

http://web.unife.it/progetti/genetica/Giorgio/PDFfiles/ajhg2003.pdf

Read More

Хүний биеийн гоо сайхны учир

Хүн яг ямар хүнийг бие махбодь, зүс царайны хувьд гоо сайхан хэмээн үзэж татагддаг вэ? Мэдээж янз бүрийн улс үндэстэн, цаг үеэс хамаарсан онцлог ялгаатай талууд байх боловч нэгдсэн хандлагууд ч бас олон байдаг юм байна. Үүнийг хүний үүсэл хөгжлийн урт хугацааны хөгжлийн дүнд хүний генд энэ үнэлэмжүүд орсон байдлаар тайлбарлаж болдог юм байна. Хүний соёл иргэншлийн нөлөө ороогүй нялх хүүхэд насанд хүрсэн хүмүүсийн сайхан гэж үздэг итгэл үнэмшлийг бас батлаж өгч чаддаг нь ийм үндэслэл бий гэж үзэхэд хүргэдэг. Өөрөөр хэлбэл хүний далд ухамсар гоо сайхныг илүүд үзэн ингэснээрээ байгалийн шалгаралд илүү амжилт гаргах, цаашлаад илүү чадварлаг үр удам үлдээх сонголт хийхэд нөлөөлдөг. Хамгийн энгийн сонголтууд гэвэл эмэгтэй хүний хувьд тэд эрчүүдийг сонгохдоо өндөр нуруутай, бие махбодийн хөгжил сайтай, цээж хэсэг сайн хөгжсөн, өргөн мөртэй, нарийвтар бэлхүүстэйг илүүд үздэг байна. Хүний хөгжлийн түүхийн туршид бие махбодийн хүч чадлын үзүүлэх нөлөө их байсаар ирсэн тул ийм эрчүүд илүү бусдаас давамгайлсан байдалтай тэргүүлэх байдлаар амьдардаг байсан нь ийм эрчүүдийг сонгон ивээлд нь байх, цаашид үр удмаа мөн тийм байлгах гэсэн уг мэдэрхүйг эмэгтэйчүүдэд шингээжээ. Эрчүүдийн хувьд тэд ихэнх цаг үе нийгэмд давамгайлсан үүрэгтэй байж ирсэн тулд эмэгтэйчүүдээс бие махбодь булчингийн хөгжил бус арай өөр зүйлийг хүсдэг байна. Юуны өмнө бэлхүүс өгзөгний тойргийн харьцаа бөгөөд уг харьцаа 0.7 байх нь ихэнх эрчүүдэд сайхан харагддаг гэнэ. Монрое, Софи Лорен гэх мэт бүсгүйчүүд ийм харьцаатай байсан гэдэг. Уг харьцааны давуу талын тайлбарлах ч боломжтой. Ийм харьцаатай бүсгүйчүүдийн эстрогений түвшин зохих түвшинд байж диабет, зүрх судасны өвчин, өндгөвчний өвчин зэрэг тусах магадлал багатай. Эрчүүдийн хувьд уг харьцаа нь 0.9 бөгөөд ийм эрчүүд үр тогтоох чадвар сайтай, төмсөг, түрүү булчирхайны хорт хавдар тусах магадлал багатай байдаг. Цаашлаад эрчүүд том хөхөнд илүүтэй дурладаг нь энэ нь эрт үед үр удмын хоол тэжээлд илүү нөлөөтэй байсантай ч холбоотой байж мэдэх л юм. Орчинд үед бол инээдтэй сонсогдож байгаа ч хүний хөгжлийн түүхийн ихэнх үе нь балар эртний маягийн цаг үе байсан шүү дээ. Биеийн өндөр намын хувьд судалгаагаар эрчүүд өөрсдөөсөө намхан бүсгүйчүүдэд илүү татагддаг гэж харагддаг бөгөөд энэ нь бие жижиг бүсгүйчүүд сексийн хувьд илүү эрт боловсордог, мөн жижиг бие илүү залуу харагдуулснаар эрчүүдийг илүүтэй татдаг талтай. Иймд ирээдүйн эрэгтэй эмэгтэй хүний дундаж өндөр ижил болох магадлал бага гэнэ.

http://en.wikipedia.org/wiki/Physical_attraction

Read More

Нумын орд

Нумын орд нь нумын оддын бүлэгтэй холбоотой өрнөдийн зурхайн орд бөгөөд уг ордод нар 11-р сарын 22-оос 12 сарын 21-ийг хүртэл хугацаанд тохионо. Нумын эсрэг орд нь ихрийн орд болно. Нумын орд нь зурхайн ес дахь орд бөгөөд уг ордыг аялан жуулчлах, өргөжин тэлэхтэй холбож үздэг. Уг ордод төрсөн хүмүүс шулуун шударга, хөдөлгөөнтэй, маш оюунлаг, ухаалаг, сэргэлэн, өндөр ёс суртахуунтай, шог хошин, өгөөмөр, нээлттэй, шинийг санаачлагч, өрөвч, хүч чадалтай хүмүүс байдаг боловч тэд тайван бус, огцом ууртай, тэвчээргүй, анхааралгүй мөн хүүхэд маягийн зан байдалтай байх нь элбэг. Анатомийн хувьд нум нь гуя ташаатай холбоотой. Газар зүйн хувьд нумын орд нь Австрали, Мадейра, Юннан муж, Мексик, Туркменистан гэсэн газруудтай холбоотой.

Нумтнуудыг аялал жуулчлалд дуртай төдийгүй юмс үзэгдэл, эрх чөлөө, хууль ёс зэрэг олон зүйлсийн учрыг олж мэдэхэд дуртай гэдэг. Бусад ордныхонтой харьцуулахад нумынхныг хамгийн өөдрөг хүмүүс гэдэг. Нумтаны алиалагч маягийн дүрийн цаана маш оюунлаг, шинийг сэтгэгч хурц ухаан нуугдаж байдаг. Тэдний хэл нь хөдөлгөөнгүй байвч ухаан нь аянгын хурдаар ажиллаж байдаг ба амьдарлынхаа төгсгөл хүртэл энэ чадвараа хутганы ир мэт хурц байлгадаг. Тэд эерэг, өөдрөг, хошин шогч зан чанарынхаа ачаар урт наслах нь элбэг.

Бие махбодийн хувьд нумын ордод төрсөн хүмүүс том хэмжээний, зөв хэлбэрийн гавлын яс, өргөн өндөр дух, зөв хэлбэрийн бие махбодь, улаавтар үстэй байх нь элбэг. Нумтнууд нэг бол өндөр, сайн хөгжсөн биетэй эсвэл дунджаас намхан байдаг.

Өнгөрсөн үед нумын ордыг өндөр түвшний судалгаа, гүн ухаан, шашин, энэ насны дараахь амьдрал зэрэгтэй холбож үедэг байсан. Домог үлгэрт нумын ордыг грек үлгэрийн баатруудыг зааж сургаж байсан Хирон хэмээх кентавртай холбож үздэг.

Алдартай нумтнууд

* Вүүди Аллен, америкийн кино найруулагч, жүжигчин, хошин шогч (12-р сарын 1).
* Людвиг ван Бетховен, германы хөгжмийн зохиолч (12-р сарын 16 эсвэл 17).
* Волт Дисней, америкийн зураач, кино продюсер (12-р сарын 5).
* Бетте Мидлер, америкийн жүжигчин, дуучин (12-р сарын 1).
* Френк Синатра, америкийн дуучин, жүжигчин (12-р сарын 12).
* Стивен Спилберг, америкийн кино найруулагч (12-р сарын 18).
* Йосиф Сталин, зөвлөлтийн удирдагч (12-р сарын 18).

Read More